SISYPHUS

Bakong gapo, Sisyphus,

an saimong tinutulod.

Udo ini kan mga Diyos

na mayong maginibo

kundi an maghurulnakan

mantang dai namamangnuhan

kun sain nahuhulog an ati

kan saindang mga kinakan.

Parunga an kinaban.

Bako daw na lakop na

an bata kan mga tagdo

kan mga nalalapang hawak

kan mga maurihon na Diyos?

Sinasabihan taka, Sisyphus,

kun hihilingon ka hali sa langit,

bako ka man na tawo

na nagtutulod nin gapo:

Langaw ka

na dai mapauntok

sa kaka-aro sa nag-aaringasang

na mga ati hali sa basurahan

na kalangitan.